O "Proxecto Ronsel"

As regueifas ou desafíos cantados, as lendas, os oficios tradicionais e os saberes ligados aos traballos da terra e do mar son exemplos do patrimonio cultural galego. Trátase dunha parte importante da nosa cultura, que se pretende recuperar e poñer en valor a través do Proxecto Ronsel

Con este proxecto pretendese evitar a desaparición das formas inmateriais do noso patrimonio inseríndoas na economía e na sociedade da Galiza actual. A acción coordenada da Consellería de Cultura, AGADER e o traballo dos investigadores das tres universidades galegas permiten por en marcha medidas conxuntas para aproveitar ao máximo as sinerxias.

Os dous aspectos nos que pon énfase o Proxecto Ronsel son por unha banda a investigación e por outra a promoción.

No que se refire á investigación, búscase facer un inventario completo do patrimonio inmaterial e contactar coas persoas e grupos que manteñen vivo o noso patrimonio inmaterial e aqueles que traballan a prol da súa conservación.

No que se refire á promoción, puxéronse en marcha as Mostras de Patrimonio Cultural Inmaterial, que se celebran anualmente para dar a coñecer a importancia e riqueza destes saberes e tradicións. Creouse ademais a web http://webs.uvigo.es/ronsel/, con información sobre o proxecto, novas e eventos relacionados co patrimonio cultural inmaterial e manifestacións dese patrimonio recollidas en distintos soportes.

Uns exemplos desta divulgación do patrimonio inmaterial, son unha serie de vídeos explicativos de cómo se constrúen uns sinxelos instrumentos musicáis tradicionáis.